រដ្ឋបាលខេត្តព្រះសីហនុ

ព្រឹក​ថ្ងៃទី​៣១​ ខែឧសភា​ ឆ្នាំ​២០២៤ ឯកឧត្តម​ គួច​ ចំរើន​ អភិបាល​ នៃគណៈអភិបាលខេត្តព្រះសីហនុ​ បាន​អញ្ជើញ​គោរពវិញ្ញាណក្ខន្ធសព​ ព្រឹទ្ធមហាឧបាសិកាពុទ្ធសាសនូបត្ថម្ភក៍​ គង់​ ម៉ាលី​ ដែលត្រូវជាបងស្រីបង្កេីតរបស់​ សម្តេច​ចៅហ្វាយវាំង​ វរវៀងជ័យ​ អធិបតីស្រីង្ការ គង់ សំអុល ​ឧបនាយករដ្ឋមន្ត្រី​ និងជារដ្ឋមន្រ្តីក្រសួងព្រះបរមរាជវាំង និងលោកជំទាវ​ បានទទួលមរណភាព​ កាលពី​ថ្ងៃទី​២៩​ ខែឧសភា​ ឆ្នាំ​២០២៤​ ក្នុងជន្មាយុ ៩៨ឆ្នាំ​ ដោយជរាពាធ​។

នៅរសៀលថ្ងៃទី២៩ ខែឧសភា ឆ្នាំ២០២៤ លោក ឯម ភាព អភិបាលរងខេត្តព្រះសីហនុ បានអញ្ជើញដឹកនាំកិច្ចប្រជុំពិភាក្សាអំពីការបំពេញរបាយការណ៍របស់ក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ដោយមានការចូលរួមពីលោកនាយក នាយករងរដ្ឋបាលសាលាខេត្ត អភិបាលក្រុង ស្រុក ប្រធានមន្ទីរអង្គភាព និងការិយាល័យ ចំណុះរដ្ឋបាលខេត្តព្រះសីហនុ។

នៅរសៀលថ្ងៃទី២៩ ខែឧសភា ឆ្នាំ២០២៤ លោក ម៉ាង ស៊ីណេត អភិបាលរងខេត្តព្រះសីហនុ បានអញ្ជើញដឹកនាំកិច្ចប្រជុំពិភាក្សាស្តីពីការផ្តល់ធាតុចូលលើសេចក្តីព្រាងផែនការយុទ្ធសាស្ត្រ ស្តីពីការ អនុវត្តគោលនយោបាយ-ភូមិ-ឃុំ-សង្កាត់មានសុវត្ថិភាព ក្រសួងមហាផ្ទៃ ឆ្នាំ២០២៤- ២០២៨។

នារសៀលថ្ងៃទី២៩ ខែឧសភា ឆ្នាំ២០២៤ លោក ជាវ វិជ្ជាក់ អភិបាលរងខេត្តព្រះសីហនុ បានចូលរួមកិច្ចប្រជុំស្តីពី វឌ្ឍនភាពកិច្ចប្រតិបត្តិការចុះសិក្សា និងបោសសម្អាតគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចនៅបាតទន្លេ និងសមុទ្រ ក្រោមអធិបតីភាពដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផៃ្ទ នៅសាលប្រជុំទីស្តីការក្រសួងមហាផ្ទៃ។

ព្រឹកថ្ងៃទី២៩ ខែឧសភា ឆ្នាំ២០២៤ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចូលរួមដាំកូនក្ងោកចំនួន ៨៨៤ដើម ធ្វើការដាំដុះអមសងខាងផ្លូវជាតិលេខ៤ ចាប់ពីខាងមុខផ្លូវល្បឿនលឿនមកដល់រោងចក្រក្រោន ដែលសម្របសម្រួលដោយមន្ទីរកសិកម្មររុក្ខាប្រមាញ់ និងនេសាទខេត្តព្រះសីហនុ ដោយមានការចូលរួមពីឯកឧត្តម លោកជំទាវ អភិបាលរងខេត្ត អភិបាលក្រុងស្រុក ប្រធានមន្ទីរ អង្គភាព ស.ស.យ.ក យុវជនកាកបាទក្រហមកម្ពុជា យុវជនកាយរិទ្ធ អ.ម.ត និងសិក្សានុសិស្សមេបញ្ជាការកងពលតូចអន្តរាគមន៍លេខ៤ ទិសឧត្តរមានជ័យ។