ឯកឧត្តមអភិបាលខេត្ត ដឹកនាំគណៈប្រតិភូចុះសួរសុខទុក្ខកងទ័ពការពារព្រំដែនទិសទី៣ ក្នុងទឹកដីខេត្តឧត្តរមានជ័យ

ឯកឧត្តម ឧត្តមសេនីទោ សន ស៊ា មេបញ្ជាការកងពលតូចអន្តរាគមន៍លេខ ៤ ដែលជាអង្គភាពសម្ព័ន្ធមេត្រីជាមួយខេត្តព្រះសីហនុ បានរាយការណ៍ជូនគណៈប្រតិភូខេត្តព្រះសីហនុ អំពីភារកិច្ចដែលអង្គភាពទ័ពទទួលអនុវត្តក្នុងកិច្ចការពារភូមិសាស្រ្ត និងថ្លែងអំណរគុណចំពោះឯកឧត្តមអភិបាល ខេត្ត និងគណៈប្រតិភូអមដំណើរដែលមកសួរសុខទុក្ខ និងឧបត្ថម្ភនូវអំណោយជាគ្រឿងឧបភោគ បរិភោគ រួមនឹងថវិកាជាច្រើនលានរៀលទៀតដើម្បី ចែកជូនដល់កងទ័ពនិងគ្រួសារទ័ព ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់ក្នុងរយៈពេលប៉ុន្មានថ្ងៃខាងមុខនេះ។

មានប្រសាសន៍សំណេះសំណាលទៅកាន់មេបញ្ជាការ មេបញ្ជាការរង នាយទាហាន នាយទាហានរង ពលទាហាន និងគ្រួសារទ័ព ទាំងអស់ ឯកឧត្តម យន្ត មីន អភិបាលខេត្តព្រះសីហនុ បានពាំនាំប្រសាសន៍ផ្តាំផ្ញើការសាកសួរសុខទុក្ខពីសំណាក់មន្រ្តីរាជការ កងកម្លាំងប្រដាប់អាវុធគ្រប់ស្ថាប័ប្រជាពលរដ្ឋ កម្មករ និងអាជីវករ រស់នៅខេត្តព្រះសីហនុ ជូនដល់នាយទាហាន នាយទាហានរង និងពលទាហានទាំងអស់ដែលកំពុងឈរជើងក្នុងភូមិសាស្ត្រខេត្តឧត្តរមានជ័យ។

ឯកឧត្តម អភិបាលខេត្ត មានប្រសាសន៍បញ្ជាក់ថា មន្ត្រីរាជការប្រជាពលរដ្ឋ កម្មករនិង អាជីវករ នៅខេត្តព្រះសីហនុសូមសម្តែងនូវការគោរពដឹងគុណដល់វីរៈភាពដ៏អង់អាចក្លាហាន របស់នាយទាហាន នាយទាហានរង និងពលទាហានក្នុងកងពលតូចអន្តរគមន៍លេខ ៤ ដែលបានខិតខំបំពេញភារកិច្ចដើម្បីការពារជាតិមាតុភូមិ ហើយកងពលតូចអន្តរាគមន៍លេខ៤ បានចង សម្ព័ន្ធមេត្រីភាពជាមួយខេត្តព្រះសីហនុ គឺជាការបើកឱកាសឲ្យមន្ត្រីរាជការ និងប្រជាពលរដ្ឋនៅខាង ក្រោយបានចែករំលែកធនធានសម្ភារៈថវិកា ឧបត្ថម្ភដល់កងទ័ពដើម្បីផ្សារភ្ជាប់រវាងកងទ័ពជាមួយមន្ត្រី រាជការ និងប្រជាពលរដ្ឋ។ ហើយសំរាប់ពិធីបុណ្យចូលឆ្នាំថ្មីប្រពៃណីជាតិខ្មែរនេះ ខេត្តព្រះសីហនុបានឧបត្ថម្ភជូនអង្គភាពកងទ័ពសម្ពន្ធ័មេត្រីភាពសាលាខេត្តព្រះសីហនុ ប្រើប្រាស់ថវិកាសរុបចំនួនជាង១៦៥លានរៀលក្នុងនោះរួមមាន គ្រឿងឧបភោគ និង បរិភោគផងដែរ៕ TR

រូបថត លោក តាំង ហៀងឈុង និងលោក រ៊ី នោរៀ