លោក ឡុង ឌីម៉ង់ តំណាងរដ្ឋបាលខេត្តព្រះសីហនុ អញ្ជើញចូលរួមក្នុងជំនួបសម្តែងការគួរសម និងពិភាក្សាការងារជាមួយ ឯកឧត្តម ប៉េង ពោធិ៍សា អភិបាលខេត្តស្វាយរៀង

នៅក្នុងជំនួបនេះ ឯកឧត្តមអភិបាលខេត្តស្វាយរៀងបានសម្តែងគារវកិច្ច និងថ្លែងអំណរគុណដល់គណៈប្រតិភូ ព្រមទាំងបានជម្រាបជូនអង្គពិធីអំពីស្ថានភាពសេដ្ឋកិច្ច ភូមិសាស្ត្រ និងសក្តានុពលខេត្ត ដើម្បីជាធាតុចូលសំខាន់ក្នុងការងារអភិវឌ្ឍន៍សេដ្ឋកិច្ចមូលដ្ឋាន និងឈានទៅរកការកែទម្រង់ការគ្រប់គ្រងហិរញ្ញវត្ថុសាធារណៈ។

ជាមួយគ្នានេះ ឯកឧត្តមប្រធានគណៈប្រតិភូ បានជម្រាបជូនអង្គពិធី អំពីគោលបំណង នៃដំណើរទស្សនៈកិច្ច និងសារៈសំខាន់ ចំពោះការរៀបចំ «របាយការណ៍វិភាគភាពខ្លាំង ភាពខ្សោយ កាលានុវត្តភាព និងការគំរាមកំហែង លើទិដ្ឋភាពសង្គម-សេដ្ឋកិច្ចរបស់ខេត្ត»។ ឯកឧត្តមប្រធាន បានគូសបញ្ជាក់ថា របាយការណ៍នេះ នឹងដើរតួជាត្រីវិស័យ ក្នុងការកំណត់សក្តានុពលរបស់ខេត្ត, កាត់បន្ថយជាអតិបរមានូវភាពអសកម្ម, ដោះស្រាយហានិភ័យដែលអាចកើតមានឡើង និងប្រែក្លាយទៅជាកាលានុវត្តភាព និងមានលទ្ធភាពគ្រប់គ្រាន់ក្នុងការចាប់យកឱកាសផ្សេងៗ ដែលនឹងមកដល់។