ឯកឧត្តម ម៉ាង ស៊ីណេត អភិបាលរងខេត្តព្រះសីហនុ អញ្ជើញជាអធិបតីបិទព្រឹត្តិការណ៍ទេសចរណ៍ និងកីឡា កម្ពុជា វៀតណាម ថៃ (CVTEC)

លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុបានឱ្យដឹងថា នៅក្នុងព្រឹត្តិការណ៍ទេសចរណ៍ និងកីឡា ក្រោមប្រធានបទ “គោលដៅរួមតែមួយរីកចម្រើនរួមគ្នា” “One Common Goal: Growing Together” កម្ពុជា វៀតណាម ថៃ នៅខេត្តព្រះសីហនុ រយៈពេល ៥ថ្ងៃ មានភ្ញៀវចូលរួមទស្សនាសរុបប្រមាណ ២ម៉ឺននាក់ ក្នុងនោះភ្ញៀវបរទេសប្រមាណ ១ពាន់នាក់ ដោយមានថ្នាក់ដឹកនាំក្រសួងទេសចរអភិបាល-អភិបាលរងខេត្តតំបន់ឆ្នេរប្រទេស ទាំង៣ រាជធានី ខេត្ត វិស័យឯកជន សារព័ត៌មាន និងធុរជន អ្នកលក់ អ្នកទិញសរុបប្រមាណ ២០០នាក់និង (ភ្ញៀវអន្តរជាតិប្រមាណ ៥០នាក់)។

កិច្ចប្រជុំស្ដីពីការជំរុញលំហូរទេសចរតំបន់ឆ្នេរ នៃរបៀងសេដ្ឋកិច្ចកម្ពុជា វៀតណាម ថៃ (CVTEC) ដឹកនាំឯកឧត្តម លោក នី ផល្លី រដ្ឋលេខាធិការក្រសួងទេសចរណ៍ និងឯកឧត្តម ម៉ាង ស៊ីណេត អភិបាលរងខេត្តព្រះសីហនុ កិច្ចប្រជុំបានពិភាក្សាលើឱកាស និងបញ្ហាប្រឈម ការជំរុញលំហូរទេសចរតាមបណ្តាខេត្តតំបន់ឆ្នេររវាងកម្ពុជា វៀតណាម ថៃ ផ្ដោតលើ ៤ ចំណុចគឺ ការសម្របសម្រួលការធ្វើដំណើររបស់ភ្ញៀវទេសចរ ការអភិវឌ្ឍន៍ និងវិនិយោគផលិតផលទេសចរណ៍ ការផ្សព្វផ្សាយព្រឹត្តិការណ៍CVTECនិងទេសចរណ៍ និងយុទ្ធសាស្ត្រCVTEC។

កម្មវិធីជំនួបធុរកិច្ចទេសចរណ៍រវាងអ្នកលក់ និងអ្នកទិញ និងសារព័ត៌មានអន្តរជាតិ ដែលបានចូលរួមបានវាយតម្លៃខ្ពស់ចំពោះខេត្តព្រះសីហនុដែលមានមន្ទីទេសចរណ៍ និងសភាពាណិជ្ជកម្មជាអ្នកសម្របសម្រួលរៀបចំ មានការគាំទ្រដោយក្រសួងទេចរណ៍ ដែលបានរៀបចំកិច្ចប្រជុំ អមដោយព្រឹត្តិការណ៍ទេសចរណ៍ និងកីឡា មានលក្ខណៈល្អប្រសើរ និងទទួលបានលទ្ធផលជោគជ័យ សង្ឃឹមថានឹងមានលំហូរភ្ញៀវទេសចរជាតិ អាស៊ាន និងអន្តរជាតិចូលមកកាន់គោលដៅទេសចរណ៍តំបន់ឆ្នេរនៃប្រទេសទាំង៣ កាន់តែច្រើនឡើងនៅពេលខាងមុខ។ ប្រតិភូ អ្នកលក់អ្នកទិញ និងអ្នកសារព័ត៌មានអន្តរជាតិ និងនាំយកនូវលទ្ធផលដែលទទួលបានពីការចូលរួមពិព័រណ៍CVTEC ទៅផ្សព្វផ្សាយទៅកាន់ទីផ្សារទេសចរណ៍ពិភពលោក និងភ្ញៀវទេសចរឱ្យបានទូលំទូលាយបន្ថែមទៀត។

ឯកឧត្តម ម៉ាង ស៉ីណេត មានប្រសាសន៍បិទព្រឹត្តិការណ៍ទេសចរណ៍ និងកីឡា កម្ពុជា វៀតណាម ថៃ (CVTEC) នៅលើទឹកដីតំបន់ឆ្នេរខេត្តព្រះសីហនុ ដោយកោតសរសើរក្រសួងទេសចរណ៍ មន្ទីរទេសចរណ៍ខេត្ត មន្ទីរ-អង្គភាព កងកម្លាំងប្រដាប់អាវុធគ្រប់លំដាប់ថ្នាក់ និងសភាពាណិជ្ជកម្ម-ឧស្សាហកម្ម សមាគមទេសចរណ៍ ធុរៈកិច្ចទេសចរណ៍ Group of Buyer and Seller និងអ្នកសារព័ត៌មានជាតិ-អន្តរជាតិ ដែលបានចំណាយពេលវេលា និងធនធាន ព្រមទាំងបានចូលរួមសហការយ៉ាងសកម្មធ្វើឱ្យ ព្រឹត្តិការណ៍ទេសចរណ៍ និងកីឡា កម្ពុជា វៀតណាម ថៃ (CVTEC) ប្រព្រឹត្តទៅដោយរលូន និងទទួលបានជោគជ័យយ៉ាងល្អប្រសើរ។

ព្រឹត្តិការណ៍ទេសចរណ៍ និងកីឡា នៃប្រទេសទាំងបីគឺ មានសារៈសំខាន់ និងបានចូលរួមចំណែកយ៉ាងធំធេងក្នុងការចូលរួមផ្សព្វផ្សាយយុទ្ធនាការ “ឆ្នាំទស្សនាកម្ពុជា ២០២៣» ក្រោមពាក្យស្លោក «គ្រប់ថ្ងៃ គឺជាអច្ឆរិយភាព» ដើម្បីលើកកម្ពស់កិត្តិនាមទេសចរណ៍ «កម្ពុជា ព្រះរាជាណាចក្រអច្ឆរិយ ផ្តល់ភាពកក់ក្តៅ» នៅលើទីផ្សារទេសចរណ៍ សំដៅលើការទាក់ទាញភ្ញៀវទេសចរ ជាតិនិងអន្តរជាតិ ឱ្យកាន់ច្រើននៅឆ្នាំ២០២៣ និងផ្សារភ្ជាប់រវាងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដើម្បីបង្កើនឧត្តមភាពប្រកួតប្រជែងទេសចរណ៍កម្ពុជាក្រោយវិបត្តិជំងឺកូវីដ-១៩ ព្រមទាំងផ្សព្វផ្សាយ « ផែនការយុទ្ធសាស្ត្រ និងទាក់ទាញទេសចរជាតិអន្តរជាតិ រវាងខេត្តតាមតំបន់ឆ្នេរនៃប្រទេស កម្ពុជា វៀតណាម និងថៃ ក្នុងការផ្សព្វផ្សាយអំពីគោលដៅទេសចរណ៍កម្ពុជា ជាពិសេសតំបន់ទេសចរណ៍ខេត្តព្រះសីហនុ ទៅកាន់ទីផ្សារទេសចរណ៍ពិភពលោក»៕