ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញសម្ពោធសាលពិព័រណ៍គម្រោង Platinum Coast ផ្ទាំងផ្សព្វផ្សាយ 3D និងទឹករាំជាមួយភ្លើងចំរុះទី១ ស្ថិតនៅឃុំរាម

ឯកឧត្តម គួច ចំរើន អភិបាលខេត្តព្រះសីហនុ បានអបអរសាទរសម្ពោធសាលពិព័រណ៍គម្រោង Platinum Coast ផ្ទាំងផ្សព្វផ្សាយ 3D និងទឹករាំជាមួយភ្លើងចំរុះទី១ នៅប្រទេសកម្ពុជា នៃខេត្តព្រះសីហនុ ឱ្យគម្រោងទទួលបានជោគជ័យ និងមានការគាំទ្រពីអតិថិជនកាន់តែច្រើន គឺជាសក្ខីភាពដែលបង្ហាញឱ្យឃើញពីការជឿជាក់របស់អ្នកវិនិយោគទុនមកលើរាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិតដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ គម្រោងនេះពិតជាបានផ្តល់ការងារជូនប្រជាពលរដ្ឋនៅខេត្តព្រះសីហនុ ក៏ជាការចូលរួមចំណែកក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ប្រជាពលរដ្ឋស្របតាមគោលនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា គឺដើម្បីកំណើនការងារ សមធម៌ និងប្រសិទ្ធភាពនៅកម្ពុជា។

ឯកឧត្តម អភិបាលខេត្តបានបញ្ជាក់ថា ខេត្តព្រះសីហនុ មានសក្តានុពលដ៏លេចធ្លោជាមួយនឹងសន្ទុះ នៃការអភិវឌ្ឍរីកចម្រើន និងកាលានុវត្តភាពវិនិយោគជាតិ និងអន្តរជាតិ បច្ចុប្បន្នខេត្តព្រះសីហនុ ត្រូវបានរាជរដ្ឋាភិបាលកម្ពុជា កំណត់ជា “តំបន់សេដ្ឋកិច្ចពិសេសគំរូពហុបំណង” និងប្រសិទ្ធនាមជា “តារារះនាទិសនិរតី” ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ សំដៅជំរុញកំណើនសេដ្ឋកិច្ចជាតិ ជាប្រទេសមានចំណូលមធ្យមកម្រិតខ្ពស់នាឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។ បច្ចុប្បន្នខេត្តព្រះសីហនុ មានសហគ្រាសតូច-ធំ ចំនួន២២១ និងមានតំបន់សេដ្ឋកិច្ចពិសេសចំនួន ១១ទីតាំង ដែលមាន០៤ទីតាំង កំពុងដំណើរការ។ ផ្អែកតាមចក្ខុវិស័យ និងគោលនយោបាយនាពេលអនាគតដ៏ខ្លីខាងមុខនេះខេត្តព្រះសីហនុ សង្ឃឹមថានឹងទទួលបានវិនិយោគិនបរទេសជាបន្តបន្ទាប់មកវិនិយោគ ធ្វើពាណិជ្ជកម្ម និងការធ្វើទេសចរណ៍នៅខេត្តព្រះសីហនុកាន់តែច្រើននាពេលខាងមុខ។

លោកនាយកប្រតិបត្តិគម្រោង Platinum Coast បានបញ្ជាក់ថា Platinum Coast ជាគម្រោងរមណីយដ្ឋានប្រណិតជាប់លំដាប់ពិភពលោក ត្រូវបានសាងសង់នៅក្នុងទីក្រុងទេសចរណ៍ វប្បធម៌ Sihanoukville New City of LIXIN មានទំហំដី ២,៥០០ហិកតា និងបង្កើតឡើងររវាងក្រុមហ៊ុន LIXIN Group និង Honchen Group។ គម្រោងនេះហ៊ុំព័ទ្ធដោយធនធានធម្មជាតិមានទីតាំងជាប់នឹងភ្នំ បែរមុខទៅរកសមុទ្រ ហើយក៏ជាតំបន់ឆ្នេរសមុទ្រដំបូងគេនៃទីក្រុង Sihanoukville New City of LIXIN ជាមួយនឹងការបញ្ចប់ជាបន្តបន្ទាប់នៃគម្រោងធំៗមិនត្រឹមតែជាមជ្ឈមណ្ឌលទីក្រុងថ្មីសំខាន់របស់ក្រុងព្រះសីហនុនាពេលអនាគត ហើយទីនេះក៏ជាគោលដៅទេសចរណ៍វប្បធម៌អេកូឡូស៊ីសកលលោក ដែលទាក់ទាញភ្ញៀវទេសចរមកពីជុំវិញពិភពលោក និងជាមជ្ឈមណ្ឌលឧស្សាហកម្មអាស៊ីអាគ្នេយ៍នៃគម្រោង ផ្លូវមួយ ខ្សែក្រវ៉ាត់មួយ។ ការបើកដំណើរការផ្លូវល្បឿនលឿនគួបផ្សំជាមួយនឹងព្រឹត្តិការណ៍កីឡាអាស៊ីអាគ្នេយ៍ឆ្នាំនេះ ទីក្រុងព្រះសីហនុបានផ្លាស់ប្តូរូបរាងថ្មី ខ្ញុំជឿជាក់ថា ក្រុងព្រះសីហនុមានឆ្នេរសមុទ្រស្រស់ស្អាតបំផុតក្នុងប្រទេសកម្ពុជា និងឈានទៅរកការរីកចំរើនកាន់តែខ្លាំងក្នុងវិស័យទេសចរណ៍ និងវិស័យដទៃទៀត។