លោក ឡុង ឌីម៉ង់ អភិបាលរងខេត្ត អញ្ជើញដឹកនាំកិច្ចប្រជុំពង្រឹង និងលើកកំពស់ប្រសិទ្ធិភាពក្នុងការគាំទ្រដល់រដ្ឋបាលក្រុង-ស្រុក និងឃុំ-សង្កាត់ ក្នុងខេត្តព្រះសីហនុ

លោកអភិបាលរងខេត្ត បានមានប្រសាសន៍ថា កិច្ចប្រជុំនាពេលនេះ គឺដើម្បី ពិនិត្យមើលវឌ្ឍនភាពនៃការបំពេញចំណុចខ្វះខាត ក្នុងការបំពេញតួនាទីភារកិច្ចរបស់រដ្ឋបាលមូលដ្ឋានតាមការណែនាំរបស់ក្រសួងមហាផ្ទៃ និងដើម្បីជាជំហានក្នុងការពង្រឹង និងលើកកំពស់ប្រសិទ្ធិភាពក្នុងការគាំទ្រដល់រដ្ឋបាលក្រុង ស្រុក ឃុំ សង្កាត់ ក្នុងការអនុវត្តគម្រោងមូលនិធិក្រុង ស្រុក ឃុំ សង្កាត់។

លោកអភិបាលរងបានណែនាំឱ្យអស់លោក លោកស្រីយកចិត្តទុកដាក់ទៅលើ ប្រសិទ្ធភាព ប្រសិទ្ធិផលនៃការអនុវត្តការងារនៅមូលដ្ឋានរបស់ខ្លួន។

បន្ថែមពីលើនេះ អភិបាលក្រុង ស្រុក មេឃុំចៅ សង្កាត់ទាំងអស់ត្រូវ ធ្វើអាទិភាវូបនីយកម្មការអភិវឌ្ឍធនធានមនុស្សនៅក្នុងស្ថាប័ន និងប្រើធនធានដែលមានស្រាប់ឱ្យត្រូវតាមសក្តានុពល និងអស់លទ្ធភាព។