លោក ឡុង ឌីម៉ង់ អភិបាលរង​ខេត្តព្រះសីហនុ និងលោក លី ឆល់សឹង អញ្ជើញចូលរួមការសំដែងសិល្បៈផ្លាស់ប្តូរវប្បធម៌កម្ពុជា-កូរ៉េ របស់ក្រុមសិល្បៈពហុវប្បធម៌កុមារទីក្រុងឆាងវុន នៃសាធារណរដ្ឋកូរ៉េ និងសិល្បៈកុមារខេត្តព្រះសីហនុ

លោក ឡុង ឌីម៉ង់ អភិបាលរងខេត្តព្រះសីហនុ បានថ្លែងថា ពិធីសំដែងសិល្បៈផ្លាស់ប្តូរវប្បធម៌កម្ពុជា-កូរ៉េ នៅលើទឹកដីតំបន់ឆ្នេរដ៏ស្រស់បំព្រង នៃខេត្តព្រះសីហនុ ជាការបំពេញទស្សនកិច្ច និងចូលរួមសម្តែងផ្ទាំងទស្សនីយភាពសិល្បៈផ្លាស់ប្តូរវប្បធម៌កម្ពុជា-កូរ៉េ ។

លោកអភិបាលរងខេត្ត បញ្ជាក់ថាខេត្តព្រះសីហនុ និងទីក្រុងឆាងវុន នៃសាធារណរដ្ឋកូរ៉េ បានបង្កើតចំណងមិត្តភាពជាខេត្ត-ក្រុងសម្ព័ន្ធមេត្រីភាពតាំងពីឆ្នាំ ២០១៧ និងបានផ្លាស់ប្តូរកិច្ចសហប្រតិ បត្តិការលើវិស័យសេដ្ឋកិច្ច ទេសចរណ៍ អប់រំ វប្បធម៌ បណ្តុះបណ្តាលធនធានមនុស្ស និងទស្សនកិច្ចសិក្សានាពេលកន្លងមក។​ ជាក់ស្តែងតបតាមការអញ្ជើញរបស់ទីក្រុង ឆាងវ៉ុន ខ្ញុំបាទត្រូវបានចាត់ជាតំណាងរដ្ឋបាលខេត្ត ចូលរួមកម្មវិធីបុណ្យ ផ្កា Masan Kuk Hwa Chhuk Je លើកទី២២ (ម៉ាសាន គុគហ្វា ឈុកចេ) នាខែតុលា ឆ្នាំ២០២២ថ្មីៗនេះ។ ការរៀបចំសម្តែងសិល្បៈ ក្នុងគោលបំណងពង្រឹងទំនាក់ទំនងមិត្តភាពខេត្ត-ក្រុងបងប្អូន និងពង្រីកកិច្ចសហប្រតិបត្តិការលើវិស័យវប្បធម៌ ដើម្បីបង្កលក្ខណៈ​ដល់ប្រជាជន នៃប្រទេសទាំងពីរ (កម្ពុជា-កូរ៉) បង្កើតភាពស្និទ្ធស្នាលស្វែងយល់ពីគ្នាកាន់តែច្បាស់ និងផ្សព្វផ្សាយពីសក្កានុពលវប្បធម៌ ទេសចរណ៍ និងធុរកិច្ចទៅកាន់សាធារណជនកូរ៉េ និងប្រជាពលរដ្ឋ នៃខេត្តព្រះសីហនុ។

លោក លី ឆល់សឹង (Lee Cheol-Seung) ប្រធានក្រុមផ្លាស់ប្តូរវប្បធម៌កូរ៉េ-កម្ពុជាជាតំណាងមជ្ឈមណ្ឌលទ្រទ្រង់ជនបរទេសខេត្តក្យុងសាំងណាម អាញ៉ុងហាសីមនីកា ថ្លែងអំណរគុណរដ្ឋបាលខេត្តព្រះសីហនុ អនុញ្ញាតឱ្យមានកម្មវិធីផ្លាស់ប្តូរវប្បធម៌កូរ៉េ-កម្ពុជា ប្រកបដោយអត្ថន័យយ៉ាងជ្រាលជ្រៅផ្លាស់ប្តូរវប្បធម៌ប្រទេសទាំង២ ដោយមានប្រជាជនកម្ពុជាប្រមាណ ៤០,០០០នាក់ រស់នៅក្នុងប្រទេសកូរ៉េ និងជនជាតិកូរ៉េចំនួនប្រមាណ ១១,០០០នាក់រស់នៅក្នុងប្រទេសកម្ពុជា។ កម្ពុជាជាគោលដៅទេសចរណ៍ពេញនិយមសម្រាប់ប្រជាជនកូរ៉េ ជារៀងរាល់ឆ្នាំមានអ្នកទេសចរណ៍ជនជាតិកូរ៉េប្រហែល ៦,០០០នាក់ មកលេងប្រទេសកម្ពុជា ហើយប្រជាជនកម្ពុជាមួយចំនួនធំទៅលេងប្រទេសកូរ៉េផងដែរ។ តាមការផ្លាស់ប្តូរវប្បធម៌រវាងកូរ៉េ និងកម្ពុជា បានរីកសុះសាយយ៉ាងទូលំទូលាយជាឱកាសសម្រាប់ទីក្រុងឆាងវ៉ុន និងខេត្តព្រះសីហនុ កាន់តែជិតគ្នា។ ក្នុងឆ្នាំ២០១៦ ក្នុងមហោស្រព MAMF ជាមហោស្រពពហុវប្បធម៌ចម្រុះដ៏ធំនៅប្រទេសកូរ៉េ ដែលមាន ១៥ប្រទេស​ចូលរួមក្នុងនោះប្រទេសកម្ពុជាក៏បានចូលរួមបង្ហាញពីភាពអស្ចារ្យ នៃសិល្បៈប្រពៃណីខ្មែរដល់ប្រជាជនកូរ៉េ។ ការសម្តែងនាពេលនេះ និងចាក់ផ្សាយតាមទូរទស្សន៍កូរ៉េ ហើយបានផ្តល់ឱកាសឱ្យប្រជាជនកូរ៉េបានស្វែងយល់អំពីវប្បធម៌ និងសិល្បៈដ៏ល្អផូរផង់របស់ប្រទេសកម្ពុជា។ ឆ្នាំ២០១៧ ទីក្រុងឆាងវ៉ុន និងក្រុងព្រះសីហនុបានចុះហត្ថលេខាលើកិច្ចព្រមព្រៀងទីក្រុងបងប្អូន ។

ក្រុមសិល្បៈវប្បធម៌ប្រពៃណីរបស់ប្រទេសកូរ៉េ “Jingwang” ដែលនឹងសម្តែងគឺជាក្រុមដែលត្រូវបង្កើតឡើង ដើម្បីផ្សព្វផ្សាយវប្បធម៌ និងសិល្បៈប្រពៃណីរបស់ប្រទេសកូរ៉េ ហើយជាក្រុមសិល្បៈប្រពៃណីតំណាងរបស់ប្រទេសកូរ៉េ ដែលបាននឹងកំពុងសម្តែងនៅក្នុងប្រទេស។ ដោយឡែកក្រុមចម្រៀងកុមារា និងកុមារី ពហុវប្បធម៌ “ទាំងអស់គ្នា” ត្រូវបានបង្កើតឡើងដោយកុមារ និងក្មេងជំទង់ដែលមានឪពុកម្តាយជាជនបរទេស។ បង្កើតឡើងក្នុងឆ្នាំ២០១០ ក្រុមនេះបានចូលរួមយ៉ាង សកម្មនៅក្នុងព្រឹត្តិការណ៍សម្តែងដែលរៀបចំដោយរដ្ឋាភិបាលតាមការអញ្ជើញទៅក្រៅប្រទេស។

លោកបានបន្តថា ក្រុងព្រះសីហនុ ជាទីក្រុងមាត់សមុទ្រប្រវត្តិសាស្ត្រ និងស្រស់ស្អាតរបស់កម្ពុជា។ ខ្ញុំសង្ឃឹមថា ការសម្តែងវប្បធម៌កូរ៉េ-កម្ពុជាថ្ងៃនេះ ជាឱកាសសម្រាប់ប្រជាជន នៃប្រទេសទាំងពីរក្នុងការអភិវឌ្ឍទំនាក់ទំនងមិត្តភាពកាន់តែជិតស្និទ្ធ។ (ឆាងវ៉ុន និងព្រះសីហនុ ស្រដៀងគ្នាទីក្រុងទាំងពីរជាទីក្រុងឆ្នេរសមុទ្រ និងទីក្រុងនៃពហុវប្បធម៌បើកចំហ។ តាមរយៈការសម្តែងក្រុមចម្រៀងផ្លាស់ប្តូរវប្បធម៌រវាងឆាងវ៉ុន និងខេត្តព្រះសីហនុកាន់តែសកម្ម ហើយប្រជាជនកូរ៉េដែលរស់នៅក្នុងតំបន់ទាំងពីរកាន់តែមានស្ថិរភាពនៅក្នុងសហគមន៍មូលដ្ឋាន។ នេះជាសមិទ្ធផលនៃការផ្លាស់ប្តូរ និងកិច្ចសហប្រតិបត្តិការយ៉ាងជិតស្និទ្ធរវាងទីក្រុងឆាងវ៉ុន និងខេត្តព្រះសីហនុក្នុងកម្រិតឯកជន និងជាការចាប់ផ្តើម នៃការទូតឯកជនសកម្ម៕