ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម គួច ចំរើន ប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ អញ្ញើញសំណេះសំណាលជាមួយប្រជាពលរដ្ឋក្រីក្រ

ឯកឧត្តម គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានពាំនាំការសាកសួរសុខទុក្ខ និងសេចក្តីនឹករលឹកពីសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋក្រីក្រ និងអ្នកផ្ទុកមេរោគអេដស៍ក្នុងស្រុកកំពង់សីលា។ តាមរយៈការរៀបចំសំណើស្នើសុំពីអាជ្ញាធរជាក់ស្តែងលើគ្រួសារក្រីក្រខ្វះខាតជីវភាព យើងមានស្ថិតិប្រភេទក្រ១ និងក្រ២ តែស្ថានភាពមានការប្រែប្រួល។ ដោយពិនិត្យតាមការជាត់ស្តែងពីមន្ត្រីពាក់ព័ន្ធសម្រេចកំណត់ជ្រើសរើសប្រជាពលរដ្ឋក្រីក្រខ្វះខាតជីវភាពក្នុងរដូវវស្សា។ ឆ្នាំនេះខេត្តព្រះសីហនុ មិនមានរងគ្រោះដោយជំនន់ទឹកភ្លៀងដូចបណ្តាខេត្តមួយចំនួន ដែលសម្តេចតេជោ បានកំពុងធ្វើដំណើរជុំវិញបឹងទន្លេសាប ដើម្បីចុះចែកអំណោយ និងពូជស្រូវជូនប្រជាពលរដ្ឋរងគ្រោះដោយជំនន់ទឹកភ្លៀងខូចខាតស្រូវស្រែ។

ក្នុងឱកាសនោះឯកឧត្តម ប្រធានគណ:កម្មាធិការសាខាបាននាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមចែកជូនប្រជាពលរដ្ឋក្រីក្រចំនួន ៣១៨គ្រួសារ ក្នុងមួយគ្រួសារទទួលបានអង្ករ ២៥គីឡូក្រាម មី ១កេស ត្រីខ ១០កំប៉ុង កន្ទេល ១ ជែល ១ដប ឃីត ១កញ្ចប់ (សារុង១ ក្រមា១ មុង១ ភួយ១) និងថវិកា ៥ម៉ឺនរៀល។ ជូនយុវជនកាកបាទក្រហម និងអ្នកស្ម័គ្រចិត្តសាខា និងស.ស.យ.ក សរុប ៣៩នាក់ ក្នុងម្នាក់ទទួលបាន ៥ម៉ឺនរៀល៕