ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញចូលរួមដាំកូនកោងកាងចំនួន ២០០០ដើម

ឯកឧត្តមអភិបាលខេត្ត បានមានប្រសាសន៍ថា កោងកាងជារនាំងបិតបាំងការពារនូវគ្រោះធម្មជាតិ និងជារុក្ខជាតិដែលបានផលិតកាបូនសម្រាប់ជីវិតរស់នៅរបស់មនុស្ស សត្វ។ល។ ដោយសារតែការលោភលន់របស់បុគ្គលមួយចំនួនតូច ដែលបានធ្វើការកាប់បំផ្លាញនូវរុក្ខជាតិដ៏មានសារប្រយោជន៍នេះ ជាក់ស្តែងនៅលើទីតាំងនេះ គឺត្រូវបានរងនូវការកាប់បំផ្លាញព្រៃកោងកាងស្ទើរក្លាយជាវាលរហោឋានទៅហើយ។ ប្រសិនបើយើងមិនប្រញាប់ធ្វើការទប់ស្កាត់នោះទេ អំពើល្មើស និងការរីករាលដាលការកាប់បំផ្លាញព្រៃឈើ នឹងបង្កក្លាយជាវិនាសកម្មសម្រាប់សង្គមជាតិរបស់យើង។

ឯកឧត្តមអភិបាលខេត្ត បានដាក់ចេញនូវពាក្យស្លោក

(ព្រៃឈើដុះយើងរស់ ព្រៃឈើល្អយើងមានបាន ការកាប់បំផ្លាញព្រៃឈើក្ររហេមរហាម)។ ជាមួយគ្នានេះ ឯកឧត្តមអភិបាលខេត្ត បានណែនាំមន្ទីរកសិកម្ម រុក្ខាប្រមាញ់ និងនេសាទ និងខណ្ឌរដ្ឋបាលជលផល ត្រូវធ្វើរបាយការណ៍អំពីទីតាំងដែលមានការកាប់បំផ្លាញព្រៃឈើ និងព្រៃកោងកាងផ្សេងទៀត ដើម្បីចាត់វិធានការទៅតាមផ្លូវច្បាប់ ដោយត្រូវនាំខ្លួនអ្នកប្រព្រឹត្តទៅផ្តន្ទាទោសដោយគ្មានការលើកលែងឡើយ។

ជាចុងក្រោយឯកឧត្តមអភិបាលខេត្តបានអំពាវនាវដល់បងប្អូនប្រជាពលរដ្ឋទាំងអស់ សូមចូលរួមដាំដុះ ថែរក្សា ការពារព្រៃកោងកាង និងព្រៃលិចទឹក ដែលជាជម្រកមច្ឆាជាតិពងកូន ជារនាំងការពារគ្រោះធម្មជាតិ កាត់បន្ថយការប្រែប្រួលអាកាសធាតុ និងជាប្រភពចំនូលរបស់ប្រជានេសាទដើម្បីបង្កើនជីវភាពគ្រួសារ៕