លោក ឯម ភាព អភិបាលរងខេត្តព្រះសីហនុ បានទទួលជួបសម្តែងការគួរសម និងពិភាក្សាការងារជាមួយលោកស្រី Arjaree Sriratanaban

នៅក្នុងជំនួបពិភាក្សានេះ ភាគីប្រតិភូថៃ បានកោតសរសើរអំពីភាពរីកចំរើនរបស់ខេត្តព្រះសីហនុ និងសមិទ្ធផលផ្លូវល្បឿនលឿន ពីភ្នំពេញ មកខេត្តព្រះសីហនុ ជាផ្លូវស្អាត និងចំណេញពេលវេលាក្នុងការធ្វើដំណើរ ផ្លូវនេះនឹងជួយជំរុញដល់ខេត្តព្រះសីហនុ កាន់តែអភិវឌ្ឍន៍រីកចំរើនថែមមួយកំរិតទៀត និងកំពង់ផែស្វយ័តក្រុងព្រះសីហនុ ក៏មានការអភិវឌ្ឍរីកចម្រើនគួរឱ្យកត់សម្គាល់។

ក្នុងជំនួបនោះដែរ លោកអភិបាលរងខេត្ត បានជ​ម្រាបជូនប្រតិភូអំពីលទ្ធផលនៃការទំនាក់ទំនង​ និងកិច្ចប្រតិបត្តិការរវាងខេត្តព្រះសីហនុ និងប្រទេសថៃ រួមមានការទំនាក់ទំនងលើវិស័យពាណិជ្ជកម្ម ទេសចរណ៍ និងការទំនាក់ទំនងរបស់ខេត្តសម្ព័ន្ធមេត្រីភាព និងបានស្នើសុំដល់ប្រតិភូជួយជំរុញលើការចុះហត្ថលេខាការបង្កើត ខេត្តសម្ព័ន្ធភាពរវាងខេត្តព្រះសីហនុ និងខេត្តចន្ទបូរី ព្រមទាំងជំរុញសកម្មភាពទេសចរណ៍ និងពាណិជ្ជកម្មឡើងវិញ នូវក្រោយបរិបទជំងឺកូវីដ១៩ អាចគ្រប់គ្រងបាន។

ជាមួយគ្នានោះ លោកស្រីប្រធានប្រតិភូ បានទទួលសំណើនេះ និងស្នើសុំការសម្របសម្រួលពីរដ្ឋបាលខេត្តព្រះសីហនុ លើការងារសំខាន់ពីរគឺ៖

១. សម្របសម្រួលបញ្ជូនប្រជាជនថៃ ដែលមកធ្វើការខុសច្បាប់នៅខេត្តព្រះសីហនុ ត្រឡប់ទៅថៃវិញ ដោយ តាមច្រកព្រំដែនខេត្តកោះកុង-ខេត្តត្រាត ដើម្បីចំណេញពេលវេលា និងកាត់បន្ថយការចំណាយ។​

២. ស្នើសុំធ្វើការដោយផ្គាល់ជាមួយមន្ត្រីសម្របសម្រួលរបស់រដ្ឋបាលខេត្ត ដើម្បីរាយការណ៍អំពី ករណីទទួលបានព័ត៌មានជនជាតិថៃ ធ្វើការនៅខេត្តព្រះសីហនុ ដោយខុសច្បាប់។​

ជាការឆ្លើយតប លោកអភិបាលរងខេត្ត បានទទួលយកសំណើ ដើម្បីរាយការណ៍ជូនឯកឧត្តមអភិបាលខេត្ត។