រដ្ឋបាលខេត្តព្រះសីហនុ
នៅព្រឹកថ្ងៃទី២៨ ខែមិថុនា ឆ្នាំ២០២២ លោក គង វិតាណៈ អភិបាលរងខេត្តព្រះសីហនុ និងលោក តេង វណ្ណឌី ប្រធានគណៈកម្មការរៀបចំការបោះឆ្នោតខេត្តព្រះសីហនុ បានអញ្ជើញជាអធិបតីភាពក្នុងពិធីប្រារព្ធសន្និបាតបូកសរុបការងារបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅមន្ទីរអប់រំ យុវជន និងកីឡាខេត្តព្រះសីហនុ។
លោក តេង វណ្ណឌី បានលើកឡើងថា ដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ និងការពិនិត្យបញ្ជីឈ្មោះ និងរចុះឈ្មោះបោះឆ្នោតឆ្នាំ២០២១ ត្រូវបានអនុវត្តន៍ដោយអនុលោមតាមរដ្ឋធម្មនុញ្ញ ច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត ច្បាប់ស្តីពីការបោះឆ្នោតជ្រើសតាំងតំណាងរាស្រ្ត ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ បទបញ្ជា និងនីតិវិធី ផែនការមេ និងប្រតិទិនការងារសម្រាប់ការបោះឆ្នោត និងការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ។
លោកបន្ដថា ជាទូទៅការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ និងការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២១ បានប្រព្រឹត្តទៅក្នុងបរិយាកាសសន្តិភាព ស្ងប់ស្ងាត់ល្អ គ្មានអំពើហិង្សា ការគំរាមកំហែង និងការបំភិតបំភ័យឡើយ។
ជាមួយគ្នានេះ លោក គង វិតាណៈ ក៏បានថ្លែងកោតសរសើរដោយស្មោះ ចំពោះគណៈកម្មការរៀបចំការបោះឆ្នោត និងមន្ត្រីបោះឆ្នោតទាំងអស់ទូទាំងខេត្ត ដែលបានប្រឹងអស់កម្លាំងកាយចិត្តក្នុងការបំពេញភារកិច្ចរបស់ខ្លួន ប្រកបដោយមនសិការទទួលខុសត្រូវខ្ពស់បំផុត ដើម្បីធានាឱ្យគណបក្សនយោបាយ អង្គការសមាគម និងប្រជាពលរដ្ឋទូទាំងខេត្តទទួលស្គាល់លទ្ធផលនៃការបោះឆ្នោតឆ្នាំនេះថា ជាការបោះឆ្នោតប្រកបដោយលក្ខណៈសេរី ត្រឹមត្រូវ និងមានសុវត្ថិភាពខ្ពស់។
លោកក៏បន្តទៀតថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ គឺជាដំណើរការដ៏សំខាន់ នៃនយោបាយកំណែទម្រងវិមជ្ឈការនៅថ្នាក់ឃុំ សង្កាត់។ តាមរយៈការបោះឆ្នោតបានបង្កើតឡើងនូវអាជ្ញាធរមូលដ្ឋាន ដែលទទួលបានការគាំទ្រពីប្រជាពលរដ្ឋ ដើម្បីលើកកម្ពស់គណនេយ្យភាពនៅមូលដ្ឋាន សំដៅរួមចំណែកក្នុងការកាត់បន្ថយភាពក្រីក្រ និងឆ្ពោះទៅរកការអភិវឌ្ឍន៍សេដ្ឋកិច្ច សង្គម របស់ជាតិយើងប្រកបដោយនិរន្តភាព។
សូមបញ្ជាក់ថា អ្នកខេត្តព្រះសីហនុ បានអញ្ជើញទៅចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ជាលទ្ធផលប្រជាពលរដ្ឋ បានចូលរួមបោះឆ្នោត សរុបចំនួន ១០៩,៨៦៤នាក់ ស្មើនឹង ៨០.៦២% និងប្រជាពលរដ្ឋដែលបានអញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោតមានចំនួន ១៣៦,២៧៥នាក់ ស្មើនឹង ៨៩.៩០% នៃប្រជាពលរដ្ឋគ្រប់អាយុ១៨ឆ្នាំឡើង សរុប ១៥១,៥៨៩នាក់ ដែលប្រការនេះ បញ្ជាក់ឱ្យឃើញនូវការចាក់គ្រឹះនៃលទ្ធិប្រជាធិបតេយ្យក្នុងសង្គមកម្ពុជា៕
