ការសំណេះ សំណាលជាមួយអ្នកផ្ទុក និងអ្នកកើតជំងឺអេដស៍ចំនួន ៣០នាក់ ក្នុងក្រុងព្រះ សីហនុ

ក្នុងឱកាសនោះ ឯកឧត្តមប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ បានពាំនាំការផ្តាំផ្ញើសួរសុខទុក្ខ នឹងសេចក្តីនឹករលឹកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរជនឆ្នើមនៃវេទិកាតំបន់អាស៊ីប៉ាស៊ីហ្វិក ជូនចំពោះ បងប្អូនផ្ទុកមេរោគអេដស៍ ដែលបានចូលរួមនាពេលនេះ ព្រមទាំងបាននាំយកគ្រឿង ឧបភោគបរិភោគ និងសម្ភារ:ចែកជូនបងប្អូនក្នុងឱកាសបុណ្យកាន់បិណ្ឌ ភ្ជំបិណ្ឌប្រពៃណីខ្មែរផងដែរ។

ឯកឧត្តមបានបន្ត តាមការពិនិត្យឃើញថា បងប្អូនអ្នកផ្ទុកមេរោគអេដស៍របស់យើងមានសុខភាពល្អ និងស្នើសុំឱ្យបងប្អូនត្រូវថែទាំសុខភាពរបស់ខ្លួនឱ្យបានរឹងមាំ ព្រោះថ្នាក់ដឹកនាំរបស់យើង មានសម្ដេចតេជោ សម្ដេចកិតិ្តព្រឹទ្ធបណ្ឌិត អាជ្ញាធរខេត្ត សាខាកាកបាទក្រហមកម្ពុជាខេត្ត ពិសេសក្រុមគ្រូពេទ្យរបស់យើង នៅរង់ចាំ និងគាំទ្រដល់បងប្អូនគ្រប់ពេលវេលា និងគ្រប់បញ្ហាទាំងអស់ ។ ក្នុងបេសកកម្មឥស្សរជនឆ្នើម សម្ដេចកិត្តិព្រឹទ្ធបណ្ឌិត តែងតែយកចិត្តទុកដាក់ជាមួយអ្នកផ្ទុក មេរោគអេដស៍ ជំងឺអេដស៍ ដោយឱ្យក្រុមគ្រូពេទ្យជួយផ្ដល់ប្រឹក្សា និងផ្ដល់ថ្នាំយកទៅប្រើប្រាស់ព្យាបាល ដើម្បីរក្សាសុខភាពឱ្យបានល្អប្រសើរ ។

ឯកឧត្តមបានបញ្ជាក់បន្ថែមថា បើតាមរបាយការណ៍របស់មន្ទីរសុខាភិបាលខេត្តព្រះ សីហនុ ក្នុងឆ្នាំ២០២១ ប្រជាពលរដ្ឋដែលបានឆ្លងជំងឺអេដស៍មាន ៤១នាក់ និងជំងឺស្វាយមាន ៥នាក់ ដូច្នេះបងប្អូនត្រូវតែទៅប្រឹក្សាជាមួយក្រុមគ្រូពេទ្យ និងលេបថ្នាំឱ្យបានទៀងទាត់ វាអាចជួយពន្យាឱ្យយើងរស់នៅរយៈពេលវែងបន្តទៀត ម្យ៉ាងទៀតសង្គមរបស់យើងមិនមានការរើសអើង ស្អប់ខ្ពើមបងប្អូននោះទេ យើងត្រូវមានសេចក្តីសង្ឃឹម នៃការរស់នៅថែទាំសុខភាពឱ្យបានល្អ និងចូលរួមអនុវត្តវិធានការ ដើម្បីកាត់ផ្តាច់ការចម្លងមេរោគអេដស៍ ។ រាជរដ្ឋាភិបាល ក៏បានដាក់ចេញទិសដៅក្នុងការកាត់ផ្តាច់ការចម្លងជំងឺអេដស៍នៅឆ្នាំ២០២៥ ។

ជាមួយគ្នានេះ ឯកឧត្តម ក៏បាននាំយកអំណោយរបស់សម្តេចកិត្តិព្រឹទ្ធបណ្ឌិត ក្នុងនាមឥស្សរជនឆ្នើមនៃវេទិកាតំបន់អាស៊ី ប៉ាស៊ីហ្វិក ឧបត្ថម្ភជូនបងប្អូនផ្ទុក មេរោគអេដស៍ក្នុងក្រុងព្រះសីហនុចំនួន ៣០នាក់ ក្នុងម្នាក់ៗទទួលបាន អង្ករ ២៥គីឡូក្រាម មី ១កេស ត្រីខ ១០កំប៉ុង ទឹកត្រី ៦ដប កន្ទេល ១ ឃីតមួយកញ្ចប់ (មុង១ ភួយ១ ក្រមា១ សារុង១) ម៉ាស ១ប្រអប់ និងថវិកា ១០ម៉ឺនរៀល៕