Home / ព័ត៌មានទូទៅ / ការចុះពិនិត្យប្លង់មេគម្រោងសាងសង់ មជ្ឈមណ្ឌលជាតិស្តារនីតិសម្បទា និងបណ្តុះបណ្តាលវិជ្ជាជីវៈ ស្ថិតនៅភូមិរីទ្ធី២ ឃុំកែវផុស

ការចុះពិនិត្យប្លង់មេគម្រោងសាងសង់ មជ្ឈមណ្ឌលជាតិស្តារនីតិសម្បទា និងបណ្តុះបណ្តាលវិជ្ជាជីវៈ ស្ថិតនៅភូមិរីទ្ធី២ ឃុំកែវផុស

នាព្រឹកថ្ងៃព្រហស្បតិ៍ ២រោច ខែស្រាពណ៍ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី០៦ ខែសីហា ឆ្នាំ២០២០ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ ឧបនាយករដ្ឋមន្ត្រី​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ចុះពិនិត្យប្លង់មេគម្រោងសាងសង់ មជ្ឈមណ្ឌលជាតិស្តារនីតិសម្បទា និងបណ្តុះបណ្តាលវិជ្ជាជីវៈ ស្ថិតនៅភូមិរីទ្ធី២

ឃុំកែវផុស ស្រុកស្ទឹងហាវ ខេត្តព្រះសីហនុ លើទំហំដី២០ហិចតា ដែលមានការចូលរួមពីសំណាក់ ឯកឧត្តម ឯកអគ្គរាជទូតថៃប្រចាំព្រះរាជាណាចក្រកម្ពុជា ឯកឧត្តម ឯកអគ្គរដ្ឋទូតវៀតណាមប្រចាំព្រះរាជាណាចក្រកម្ពុជា តំណាងក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ ក្រសួងសុខាភិបាល​ ក្រសួងសេដ្ឋកិច្ច​ និងហិរញ្ញវត្ថុ​ ក្រសួងការងារបណ្តុះបណ្តាលវិជ្ជាជីវ:​ និងគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ​ មន្ទីរអង្គរភាពពាក់ព័ន្ធផងដែរ ។
ឯកឧត្តម​ នាយឧត្តមសេនីយ៍​ កែ​ គឹមយ៉ាន​ ឧបនាយករដ្ឋមន្ត្រី​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​ ក៏បានមានប្រសាសន៍ដែរថាត្រូវជម្រុញបង្កេីនការបង្ការការពារការឆ្លងរីករាលដាលជំងឺកូវីដ-១៩​ នៅតាមមណ្ឌលព្យាបាលស្តារនីតិសម្បទាអ្នកញៀនគ្រឿងញៀន​ក្នុងកិច្ចប្រជុំត្រៀមដាក់ឱ្យដំណេីរការនូវមជ្ឈមណ្ឌលជាតិផ្តល់សេវាព្យាបាលដោយ ស្ម័គ្រចិត្តនិងផ្អែកលេីសហគមន៍នៅវត្តមានឯកអគ្គរាជទូតថៃ​ប្រចាំកម្ពុជា ឯកអគ្គរដ្ឋទូត​វៀតណាម​ តំណាងក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ ក្រសួងសុខាភិបាល​ ក្រសួងសេដ្ឋកិច្ច​ និងហិរញ្ញវត្ថុ​ ក្រសួងការងារបណ្តុះបណ្តាលវិជ្ជាជីវ:​ និងគណ:កម្មាធិការត្រួតពិនិត្យគ្រឿងញៀនខេត្តព្រះសីហនុ​ ។
ឯកឧត្តម​ បានស្នេីក្រសួងស្ថាប័ន​ពាក់ព័ន្ធទាំងអស់ត្រូវខិតខំរួមគ្នាធ្វេីការដាក់ឱ្យដំណេីរនូវមជ្ឈមណ្ឌលជាតិផ្តល់សេវាព្យាបាល​ដោយស្ម័គ្រចិត្តនិងផ្អែកលេីសហគមន៍​ នៅខេត្តព្រះសីហនុ​ នៅខែវិច្ឆិកា​ ២០២០​ ខាងមុខ​ដេីម្បីបន្ថយការភាពចង្អៀតណែន​បង្ការការឆ្លងរីករាលដាលជំងឺកូវីដ-១៩​ នៅមជ្ឈមណ្ឌលនៅរាជធានីភ្នំពេញ​។
ក្នុងឱកាសនោះ​ ឯកឧត្តម​ នាយឧត្តមសេនីយ៍​ កែ​ គឹមយ៉ាន​ បានថ្លែងបន្តថា​ ដោយមជ្ឈមណ្ឌលជាតិនេះមានការរួមចំណែកសាងសង់ដោយរាជរដ្ឋាភិបាលថៃ​ យេីងនឹងដាក់ឱ្យមជ្ឈមណ្ឌលជាតិនេះដំណេីរការស្របពេលខួបទី៧០ឆ្នាំនៃចំណងសាមគ្គីភាពនៃព្រះរាជាណាចក្រកម្ពុជា-ព្រះរាជាណាចក្រ​ថៃ​។
ជាមួយនេះ​ ឯកឧត្ដម​ បានថ្លែងបន្តទៀតថា​ មជ្ឈមណ្ឌល​ជាតិនេះ​នឹងក្លាយជាមជ្ឈមណ្ឌលដែលផ្តល់ការបណ្តុះបណ្តាលផលិតធនធានមនុស្សពហុចំណេះជំនាញ​បម្រេីដល់ទីផ្សារការងារ​នៅកម្ពុជា​ និងសូមឱ្យក្រសួងកសិកម្ម​ រុក្ខាប្រមាញ់​ និងនេសាទ និងពិចារណាផ្តល់មូលនិធិកម្ចីសម្រាប់ដំណេីរការងារកសិកម្ម។
ឯកឧត្តម​ ក៏បានថ្លែងដោយកោតសសេីរចំពោះគណ:កម្មការកសាងមជ្ឈមណ្ឌល ក្រសួងពាក់ព័ន្ធ​ ដែលបានរួមគ្នាកសាងសមិទ្ធិផលហេដ្ឋារចនាសម្ព័ន្ធ​ក្នុងមជ្ឈមណ្ឌល​ និងជាការលេីកទឹកចិត្តឯកឧត្តម​ បានផ្តល់ប្រាក់ឧបត្ថម្ភដល់ក្រុមជាង​ កម្មករ​ដែលកំពុងបំពេញការងារសាងសង់មជ្ឈមណ្ឌលផងដែរ។