លោក ឡុង ឌីម៉ង់ អភិបាលរងខេត្តព្រះសីហនុ ទទួលអំណោយមនុស្សធម៌ពីក្រុមហ៊ុន វីវី អេធីអឹម គ្រុប

លោក ឡុង ឌីម៉ង់ អភិបាលរងខេត្តព្រះសីហនុ តំណាងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ មានប្រសាសន៍ថ្លែងអំណរគុណ និងអរគុណចំពោះក្រុមហ៊ុន វីវី អេធីអឹម គ្រុប (VV.ATM GROUP) ដែលបានឧបត្ថម្ភ ជាអង្ករ មី ត្រីខ និងទឹកពិសារបរិសុទ្ធ ដល់រដ្ឋបាលខេត្ត សម្រាប់ប្រើប្រាស់ក្នុងការងារសង្គម និងមនុស្សធម៌នៅខេត្តព្រះសីហនុ នេះជាសកម្មភាពនៃការចែករំលែកចូលរួមចំណែកយ៉ាងធំធេងជាមួយរដ្ឋបាលខេត្តព្រះសីហនុ។

ក្នុងឱកាសនោះលោកអភិបាលរងខេត្តព្រះសីហនុ សង្ឃឹមជឿជាក់ថាក្រុមហ៊ុន រោងចក្រ សហគ្រាស លោកឧកញ៉ា ឯកឧត្តម លោកជំទាវ និងបងប្អូនសប្បុរសជនបន្តជួយឧបត្ថម្ភគាំទ្រជាថវិកា សម្ភារៈជួយដល់រដ្ឋបាលខេត្តព្រះសីហនុ ក្នុងការចូលរួមការងារសង្គម និងមនុស្សធម៌នៅខេត្តព្រះសីហនុ៕